//నువ్వెవ్వరో//

//నువ్వెవ్వరో//

అసలు గుర్తుందా నీ పేరైనా నీకు..
పెళ్ళికాక ముందు ఎంత గొప్పగా జీవించావని..
బడిలోనూ..గుడిలోనూ నువ్వేగా ఆకర్షణ..
కళాశాలలోనూ నీదేగా ప్రథమ ప్రతిభ..
అన్నిట్లోనూ ముందు నీవేగా ..

పెళ్ళయ్యాక..
ఏమేవ్..ఓయ్..ఒసేయ్..
పక్కింటోళ్ళకి ఆవిడ..
ఎదురింటోళ్ళకి ఎదురింటావిడ..
పిల్లలకి అమ్మ..మరదలికి వదిన..
అంతగా నిన్ను నువ్వే మరచిపోయి పతిసేవలో మునిగావుగా..

దాచుకోవాలి ఆడది మనోభావాల్ని..
ఆర్తిని..ఉద్వేగాన్ని...ఆదర్శాలని..
కాదని వ్యవస్తని కాల్తో తన్ని లేచావనుకో..
లేచి వెళ్ళావనుకోరు..లేచిపోయిందంటారు..
అందుకే సగటు స్త్రీగా మిగిలిపోవాలి..

కొంగిచ్చిందందుకేనేమో దేవుడు..
దుఃఖం వస్తే అడ్డుపెట్టుకోమని..
సంతోషం వచ్చినా నీ ముసుగులో నువ్వే ఆనందపడమని..
ఏ ఆడదీ ఈరోజుకి చెప్పలేదందుకే..
నా విజయానికి కారణం ఓ పురుషుడని..

అస్తిత్వానికి ఆరాటమెందుకులే..
చచ్చేదాకా ఛస్తూ బ్రతకడం తప్పదని నిర్ణయం జరిగిపోయాక..!!