//అభావం//

//అభావం//

ఆ నయనం నిస్తేజమే నిన్నటి వేదన రెప్పల్లో దాచిందనే
దిక్కులేని కన్నీటిస్రావాలు గుండె వెచ్చబడి కరిగినందుకే
ఆ పెదవుల్లో నిర్వేదమే మౌనవించి శూన్యాన్ని తాగిందనే
అనాదికాలపు ఆర్తి అంతఃపరిశీలనకు లక్ష్యమెరుగలేదనే..
వెతలన్నీ కథలే నిజాలన్నీ కలలంటూ మనసూహించిందనే
వసంతానికీ విరహమే ప్రతిఉదయం నిన్ను పాడుతుందనే

ఆ ప్రతీవాక్యమూ కవిత్వమే గుండెలోతుల్లోంచి రాసిందనే
ప్రతీ అక్షరంలోనూ ఆర్ద్రతే కవిత్వం పెల్లుబికి కురిసిందనే
ఆ ప్రతీపదమూ దాహమే అంతరంగ మథనంలో తేలిందనే
మనసుపొరల్లోనూ ఆవేదనే ఒక్కో చుక్కా సాహిత్యమై రాలిందనే
ఆ పరిమళమూ పవిత్రమే నిన్నుతాకి తెమ్మెరై వీచిందనే
మౌనమూ ఉల్లాసమే అంతర్నాద సంగీతానికి వివశమైందనే
భావకవిత్వమయ్యిందందుకే
అమలిన శృంగారభావనలో పుట్టిందనే..