//నా హస్తభూషణం//

//నా హస్తభూషణం//

అవినాభావ సంబంధమేగా మనది
మన పరిచయం ఈనాటిదా మరి
అక్షరస్పర్శ లేక మునుపే చేరావుగా
రంగురంగు పొత్తాల రూపంలో నన్ను
ఆనాడే నా బాల్యాన్ని మోసావుగా
కాగితపు పడువల ప్రయాణాల్లో..

అక్షరమాలను ఆవిష్కరించింది నీవేగా
రోజుకో అందమైన పదాన్ని నేర్పింది నీవేగా
విజ్ఞాన నవసమాజాన్ని పరిచయించి
నేటి నా సమున్నత జీవనానికి సాక్ష్యం నీవేగా
నాలో పఠనాశక్తి, రసాస్వాదనా పెంపొందించి
ఉత్తమాభిరుచి, వ్యక్తిత్వ వికాసాన్ని పెంచింది నీవేగా

స్నేహితులమంటూ ఎంతమంది చేరారో జీవితంలో
నడిమథ్యలో నా చేయి విడిచారింకెందరో
అయినవాళ్ళు దూరమైనా నాకత్యంత ఆప్తం నీవేగా
ఆనాడూ, ఈనాడూ నాకోదార్పూ నీవేగా
నా భావాలు నీలో చూసుకున్నా..నా అనుభూతులు పంచుకున్నా..
తెలియకుండానే నన్ను ఆత్మీయమై పెనవేసుకున్నావుగా

నీవల్లనేగా ఎంతోమంది కవులను రచయితలను చదివిందే కాక
రాగాలనూ..సంకీర్తనలనూ నేర్చింది
అందుకేనేమో..
నాలుగురోజుల్లో వికసించి వాడిపోయే పువ్వులకన్నా
నిత్యమూ నన్ను తీర్చిదిద్దే నిన్నే ఆశిస్తాను..
వేరెవరికైనా బహూకరిస్తాను..

ఎన్ని మాథ్యమాలొస్తేనేమి
విశ్వవీక్షణానికి గవాక్షమై
యువతభవితకు మార్గదర్శమై
చిరకాలమూ చిరంజీవిగా నిలిచేది నీవేగా
అందుకే నీవెప్పటికీ నా ప్రియ నేస్తానివి..
నను వీడని నా హస్త భూషణానివి..!!