అవ్యాజమైన భావాలతో అల్లుకొనే నిన్ను..
నా ఆత్మకు అద్దముగా మలచుకున్నాను..
నీ రూపు కన్నుల్లో లాస్యమైనప్పుడు
మెరుగుపెట్టిన వెన్నెల నేనై వెలిగాను
చూపులు వెదజల్లిన అమృతధారల్లో తనువారా తడిచాను
నీ ప్రేమగంధం నాపై కుమ్మరించినప్పుడు
మధుమాస కుసుమాల పరిమళన్ని ఆఘ్రాణించాను
నీలో దాగిన నేను దూదిపింజెనై తాదాత్మ్యమొందాను
నీ శ్వాసలు గాడ్పులై తాకినప్పుడు
నాపై నీ ఆర్తిని అనువదించుకున్నాను
కురులను ముద్దాడే నీ పాలవేళ్ళలో నా అరచేతులు అదుముకున్నాను..
నీ జ్ఞాపకాలు స్వరాలై మదిని మీటినప్పుడు
కొసరాత్రులకై కలవరించాను
హృదయం పాడే ప్రతిపాటలో నీ నాయికనై పురులువిప్పాను..
నీ వలపు రాతిరి లాలింపు కోరినప్పుడు
నా ఎదనే పూల ఒడిగా నీకు పరిచాను
వేకువ సుప్రభామై కావాలనుకున్నప్పుడు కలకూజితమై మేలుకొలిపాను
నీకు మాత్రమే చేరువైన నేను
నీ ఊపిరికి శృతిగా మారిపోయాను
పంచమాన్ని పలుకలేని నీ మౌనంలో
తమకమై ఏనాడో ఒదిగిపోయాను..!!
No comments:
Post a Comment