జీవించడమంటే ఏంటో తెలిసొస్తుంది
నిన్నటిదాకా బ్రతకడం మాత్రమే తెలిసినట్లు
వసంతపు తొలిపూతను చూడగానే కలిగిన ఆనందం
నిద్దుర లేపిన కోయిల సంగీతానికి ముగ్ధమవడం
ఉదయాన్ని లేపిన భూపాలరాగం హృదయతంత్రులను కదిలించడం
పూసిన ప్రతిపువ్వు మధురంగా పరిమళించడం
వీచిన గాలికి పల్లవాలతో పోటీపడి మనసు ఊగడం
వింతైన హాయిలో వివశమవ్వడం
కురిసిన తలపు చినుకు ముత్యమై మెరిసి అంతలోనే అంతర్ధానమవడం
ఇవన్నీ నిన్న కూడా ఉన్నవే..
కన్నులు తెరిచి నిద్రించే కంటికి కలలు కనబడనట్లు
శ్వాస తీసుకోవడంలోని సుఖం అవగతమవుతోంది నేడే
మరతనాన్ని వీడి మనసు బయటపడ్డందుకో
యాంత్రికతను దాటి హృదయం చెమరించినందుకో..!!
No comments:
Post a Comment