హద్దులెరుగని ఆనందంలో
హృదయమొకటి మెలిదిరిగినప్పుడు
రెక్కలిప్పిన కన్నులు కాస్తా
అరమోడ్పులై మెత్తగా నవ్వుతుంటే..
అదురుతున్న పెదవుల ప్రకంపనాల్లో
నిన్ను చదవగలిగిన సంతోషాలు
నాలో మధురిమను చిలికిస్తున్నప్పుడు
దోసిళ్ళకొద్దీ ప్రేమను నింపుకున్నట్లు
నీలో స్వప్నాలు నిద్దురలేస్తుంటే
రాతిరి పుట్టిన కోరిక పరిమళించి
మనసాపలేని ఉల్లాసముతో
ఊహల తెమ్మెరొకటి గుసగుసలాడుతుంటే
సాన్నిధ్యపు వెచ్చదనమెంత గమ్మత్తో
అతిశయానికందని భావాలతో
అనంత రాగరంజితపు అనుభూతుల కావ్యాలు
వెన్నెలై కురిసిపోవడం నాకు మాత్రమే అనుభవేకవేద్యం
నిన్నటిదాకా నిశ్శబ్దమనుకున్న సుప్రభాతం
వసంతపు కోయిలపాటగా వినబడుతుంటే
నాలో ఉప్పొంగిన రసఝరొక్కటి చాలదూ
నీలో మౌనానికి నేను స్వరమయ్యానని చెప్పేందుకు..!!
No comments:
Post a Comment