అక్కడెక్కడో కిక్కిరిసిన జనారణ్యాల మధ్యలో
ఊపిరి సలపని వేసవిలో
చిరునవ్వులను వెతకాలని చూస్తావెందుకు..
లోకమంతా నిదురించిన తర్వాత
వెన్నెలవిందులో ఒకసారి ఆశీనమవరాదా
అమలినమైన శూన్యంలో
కాంతివాహినై విచ్చేసే మందహాసమొకటి
నీ మనసుని తప్పక తాకుతుంది
మూసిన రెప్పలమాటు ఆనందంలో
లోకానికందని స్వచ్ఛమైన చిరునవ్వు
వెల్లువై నీ మోమంతా తప్పక పరుచుకుంటుంది
ఎక్కడో సాగరగర్భపు అడుగున దాగిన ముత్యపుచిప్ప లోపల
నీ నవ్వే స్వాతిముత్యమై ఒదిగిపోతుంది
ఒకనాడు పాలనురగల తరగలతో
కుసుమనాదాల మెరుపురెక్కల కడలికెరటాలతో
కలిసి తప్పక తేలియాడుతుంది..!!
No comments:
Post a Comment