స్వేదం ఏదో చెప్పనలవికాని అసౌకర్యమనుకున్నా ఇన్నాళ్ళూ
నా జీవన చైతన్యంలో సౌందర్యంతో అభివ్యక్తీకరించిన
నిన్ను చూసి కొత్తగా స్వేదాన్ని చదవడం నేర్చుకున్నా
ఆనాడు..
రవికిరణాల తాకిడికి చిరు చెమటలకోర్చే నా మోము చూసి నవ్వుతుంటే మైమురుస్తున్నావనుకున్నా
అలుకలో అలముకున్న స్వేదం అందాన్ని రెట్టింపు చేస్తుందంటే ఆటపట్టిస్తున్నావనుకున్నా
మోహం చిందించే నీ కన్నులు చిరుచెమ్మల సమ్మోహనమంటుంటే వెన్నెల కురిసిందనుకున్నా
ఈనాడు..
నీకు దూరమైన విరహంలో సంగీతం సైతం నాలో స్వేదమై వెలుగుతుందనుకుంటున్నా
అంతర్నిహిత వేదనలో మనసు చెమరిస్తుంటే నీకై నా బలహీనతే స్వేదమయ్యిందనుకుంటున్నా
నును చెమటకే చెంగలువలు నీ తలపులో పరిమళాలుగా విరబూస్తుంటే మనసును ఆపలేకున్నా
చిన్నారి పులకలేవో మదిచిత్తడిలో మొలకలేస్తుంటే దిగులు వెన్నెలవడం తెలుసుకుంటున్నా..:)
No comments:
Post a Comment