//భూకంపం//

మన తెలుగు మన సంస్కృతి నిర్వహించిన చిత్ర కవిత – 85 - భూకంపం పోటీ లో ద్వితీయ విజేతగా నిలిచిన కవిత:

//భూకంపం//

ఒక్కసారిగా వెన్నుపూసలో ఒణుకు మొదలయ్యింది
ఆ వార్త చెవిన పడినంతనే, కళ్ళారా వీక్షించినంతనే..
ఎటుచూసినా ఆర్తనాదాలు..ఛిద్రమైన బతుకులు
ఆకలికేకలు, చావుకేకలూ మిళితమయిపోయి
ఎన్నడూహించని, కనీవినీ ఎరుగని ప్రకంపనలంటే..
రాతిపొరల్లో ఏ సర్దుబాట్లు జరిగాయో
ఉపరితల గనుల పైభాగాలు కూలాయో
రెప్పపాటులో పెను విధ్వంసం..విస్పోటం
మానవతప్పిదాలు కూడా కొన్ని కారణాలేమో..
పర్యావరణ ఉద్యమకారుల ఆందోళనను
ప్రజాభిప్రాయాన్ని పెడచెవిన పెట్టడం..
విచక్షణారహితంగా చెట్లను నరకడం
అనాలోచితంగా ఖనిజ తవ్వకాలు చేపట్టడం
విచ్చలవిడిగా నదులకడ్డంగా ఆనకట్టలు కట్టదం..
ఇప్పటికైనా ప్రభుత్వంతో పాటు ప్రజ కళ్ళు తెరవాలి
చిత్తశుద్ధితో భవననిర్మాణాలు చేపట్టాలి
ఖచ్ఛితమైన మార్గదర్శకాలు పాటించి
ఆధునిక పరిజ్ఞానాన్ని మేళవించి భవనాలు కట్టాలి..
ముందుతరాలకు స్వేచ్ఛావాయువును అందించాలి..
భావిపౌరులకు సురక్షిత జీవనాన్నివ్వాలి...! 30.04.15