//హోలీ - వసంతవినోద కేళి//

//హోలీ - వసంతవినోద కేళి//

నూతనవత్సరాన్ని స్వాగతించు పున్నమిపండుగ రథోత్సవం
గడచినయేటికి వీడ్కోలుపలికే వేడుకైన వార్షికోత్సవం
మురిపాల చిన్నికృష్ణుని యశోద ఊయలలూపిన డోలోత్సవం
హోలికాదేవి 'ధుండి'ని దునిమాడిన శుభఘడియ హోలికోత్సవం..

ప్రియమైన రాధకు ప్రేమరగులద్దిన రసేశ్వరుని ప్రేమోత్సవం
ప్రకృతి దరహాసాల మురిసిన మధుమాసాల ప్రణయోత్సవం
కామునిపై శంకరుడు త్రినేత్రం గురిపెట్టి గెలిచిన విజయోత్సవం
మనసునిండుగా ప్రవహించు ఆనందరసార్ణవ మహోత్సవం

మనసుకెంతో ప్రీతికరమైన మధువనాల రసోత్సవం
సరిగంగస్నానాల మన్మధ మకరందాల మదనోత్సవం
ప్రకృతికాంత పగడాలచివురుల పైటనలంకరించు వన్సంతోత్సవం
మొగ్గతొడుగు చిలిపిఆశల విరులతొలకరుల ఆనందోత్సవం

సహస్రవర్ణాలు వజ్రవైఢూర్యాల వెలుగును తోసిరాజన్న రంగోత్సవం
ప్రేమికులొకరిపై ఒకరు కురిపించు ప్రేమజల్లుల చిలిపోత్సవం
జూకామల్లెతీవెలపై మృదుపవనాల సన్నని ప్రణవనాదోత్సవం
వేయివేణువులు అందెలరవళుల ఇరుసంయోగ రాగోత్సవం..

అరమరికలూ అసమానతలెరుగని సహృదయుల చెలిమోత్సవం
ఎదురుచూపుల నిరీక్షణాక్షణాలు ఫలించిన మధురోత్సవం
వయసు మరచిన మనసు వరదై సాగిపోవు క్రీడోత్సవం
మరలిరాని అనుభూతులను మది ప్రోదిచేసుకొను దివ్యోత్సవం..

ఆమనిసొబగుల పచ్చని పంటచేలతో రైతుకు హరితవర్ణోత్సవం
వేపవృక్షాల తెల్లనిపూవులు నడిరేయి నయనాలకు నేత్రోత్సవం
మొగ్గవిచ్చు మురిపాల ప్రేమకవిత మౌనవించిన వలపోత్సవం
మల్లెగాలి అల్లరికి మండుటెండలు చల్లనైన వెన్నెలోత్సవం

పున్నమివెన్నెల పోగులకద్దే పువ్వులపుప్పొడి హసితోత్సవం
సన్నని కాటుకకన్నుల నవ్వులు నిశీధి దివ్వెల దీపోత్సవం
కలహవివాదాలు విషాదవైషమ్యాలు మరచిపోమనే సందేశం
సంతోషసంబరాలు రంగుల హరివిల్లులైన స్వరజతుల సమ్మేళనం..