//మేఘమాల//

//మేఘమాల//

దయార్ద్రహృదయం కలిగిన ప్రియమైన మేఘం
ఆశాబంధాలు నిలబెట్టు స్వారస్య శ్యామలం
మహోపకారమే తప్ప కీడు తలవని సచేతనం..
వర్ణానికందని నీలాల మేఘమాల గమనం ..
పద్మరాగాది నవరత్నకాంతుల
ఇంద్రధనుశ్శకల అపూర్వ జననం
పుష్పలావికల చిరుచెమటలు తొలగించు వినోదం
భూతలానికి కన్నులపండుగ చేయు నీ అందం
వెండిమబ్బుల జలతారు తీవెల వెన్నెలచందం..
సమస్తవిశ్వాన వ్యాపించు నీలి రసజగం
ఇంద్రనీలమణి కలగలిసిన ముత్యాలహారం..
మహాకవులూ విద్వాంసులూ ఆదరించు అమూల్యభావం
విరహించు నదీమను సంగమించి విహరించు విలాసం
పువ్వుల జడివానతో పులకరించును సంగీతం
మదనతాపమను కార్చిచ్చును చల్లార్చు పరవశం
అలసిన మనసుల వర్షబిందువులు రాల్చు మనోహరం
కురిపించిన నీ వానతో పరిమళించును భూమి సుగంధం