//మార్పు//

//మార్పు//

జీవితంలో మార్పు..
అనివార్యమని తెలుసందరికీ..
కాలానుగుణమైన మార్పు.
అత్యంత అవసరం కూడా
మార్పును చంచలస్వభావ సూచికగా కాక..
ఆశావాహ ధృక్పధంతో స్వీకరించడం రావాలి...
మార్పును వ్యతిరేకించమని ప్రగల్భాలు పలికేవారు సైతం..
తమదాక వస్తే నిన్నటిగాలి పీల్చేందుకే మొగ్గుచూపుతారెందుకో...
ఒక సహజమైన మార్పు..
జీవితాన్ని కొత్తపుంతలు తొక్కిస్తుందని తెలిసినా
సమయానికి అందిపుచ్చుకోకుంటే.
మిగిలేది అసంతృప్తేగా..

విచ్ఛిన్నం కావా..అల్పజ్ఞుల విరుపుమాటల విచ్చుకత్తులు..
మనం స్వాగతించిన చిన్న మార్పుతోనే..
మనసు తెరిచి ఒక్కమారు మార్పును స్పృశిస్తే తెలుస్తుంది కదా..
స్వల్పమైన సత్యంలో ఎంత నిర్మలానందం దాగుందో...
శూన్యాకాశంలో తారకలెన్ని మెరుపులతో ప్రకాశిస్తున్నవో..
ఎండుటాకుల గలగలలో ఎన్ని సరిగమలు విలీనమయ్యాయో..
సద్దులేని హృదయంలో..ప్రేమైక రాగమెన్ని సంతోషపు గుసగుసలు వినిపిస్తుందో..
నిన్నటి విషాడమౌనంలో..పల్లవించు చిరునవ్వు ఎన్ని కొత్త ఆశలు నింపుతుందో..
ఎదురుచూడొద్దు ఇతరుల్లో మార్పుకోసం..
మొదట మనం మారి చూద్దాం..
ఇతరులకదే కనుపంట చేద్దాం..!!