//నవోదయం//

నీలిమేఘం కాస్త ముసురేసినంత మాత్రాన
వీచే గాలిలో పరిమళమేం తగ్గలేదు
ఆ మల్లెలు కుసుమించడం మరువలేదు
రాధామనోహరాలు తలలూపడం ఆపలేదు..

పెదవులపై చిరునవ్వుకి తెలుసు కదా
రేపటి పయనానికో గమ్యముందని
నిశ్శబ్దాన్ని వినగలిగినందుకే కదా
మౌనరహస్యం ఓ దృశ్యకావ్యమైంది..

ఈ చీకటంతా వెన్నెలెప్పుడవుతుందోనని దిగులెందుకు

రాలే ఆకుపాటలన్నీ నిరాశలుగా రాసుకుంటే
చిగురించే ప్రతి కొమ్మా సరికొత్త పల్లవికి శ్రీకారమైనట్టేగా

ఆకతాయి రంగుల కోసం ఆలోచన అనవసరమిక
ఉదయానికి పుట్టబోయే ఆనందాన్ని ప్రేమించాలనుకున్నాక ..💕