//ఆస్వాదన..//

లేతగాలుల ఆస్వాదనలో జగమంతా మునిగినప్పుడు
నీ తలపులో నేనప్పటికే తూగుతున్నా

స్వరాలన్నీ కలిసి ప్రణయగీతాన్ని ఆలపించేందుకు పిలిచినప్పుడు
నేనప్పటికే నులివెచ్చని యుగళాన్ని నీతో పంచేసుకున్నా

వెన్నెల్లో మగ్గిన సంపెంగ పరిమళం నన్నంటే నాటికి

నీ హృదయసువాసన దేహమంతా పులిమేసుకున్నా

వసంతపువ్వుల సంతోషం తేనెలూరే సమయానికి
నీ చిరునవ్వు నా పెదవుల తీయదనం చేసేసుకున్నా..

నీలిమేఘంలోని మెరుపులు తొంగిచూసేవేళకి..
నిన్నూ నన్నూ కలిపిన కన్నుల్లో తొలివాన కురిసేపోయింది

స్వప్నంకోసం అప్రమత్తమయ్యేంత ఎదురుచూపులేం లేవందుకే

నిశ్చలమైన నీ మృదుసాంగత్యమెప్పుడో నాదైనందుకే..💕