//ఉల్లాస వాన//

వాన పడుతున్నంతసేపూ అదో సంతోషం..
నీలాకాశమంత విశాలమై
నువ్వే ఏదో మాయ చేసి నన్ను తడుపుతుంటావని..
ఈరోజేమీ కొత్తగా కురవకున్నా నాలోనే మునుపులేని ఒరవడి..
చిన్న పలకరింపుకు నోచుకున్న మనసు ముత్యమైనట్టు
ఈ మునిమాపు చీకటిలో అదో వెలుతురైనట్టు
అంతరించిన మాటలు ఒక్కొక్కటిగా మొదలై
ముఖంలో చిరునవ్వు ప్రవాహమైనట్టు..

అవును..నీ పిలుపు
గుండెల్లో తొలిసారి అలికిడయ్యిన సింఫని
అంతరాత్మను అదుముకున్న చిరువేసవి ఆమని
ముద్దుగా కరచాలనం చేసిన ప్రేమని
ఎదనిండా నింపుకున్నానా ఆర్తిని

క్షణానికో ఆదమరుపు ఆవహిస్తుంటే
తేనెలూరే తొలకరితనం నాలో సౌందర్యమేగా
చినుకు తాకినట్టి పులకింతలా..
నన్నంటే తాజా ఉల్లాసం నీ మధురాధర వచనమేగా ..💜