//పువ్వుల వరద//

ఈ వానో వలపు వానైనట్టు
నన్ను వెచ్చగా నీలో వచ్చి తడవమన్నట్టు
తడవ తడవకూ ఓ పులకింత

చూపులు వాలిన సిగ్గులో
పరవశాన్ని నువ్వు పసిగడుతుంటే
చిరుగాలిని అడ్డుపెట్టి మోము దాచుకుంటున్నా..

ఋతువులతో పనిలేని వాన
నీ ప్రేమకు ఋజువైనట్టిలా కురుస్తుంటే
హృదయం పరిమళిస్తున్న సువాసనలిక్కడ

మాటలు రానట్టు నువ్వుంటూనే
నాలో కలవరమింత రేపావంటే
కలలు రాసిస్తే నన్నేం చేసెస్తావో..

ప్రేమావేశం నీ పెదవుల్లోంచీ
నా తనువునే తాకినట్టు

పూలవరదలా నాలో ఇంత అనురాగమెందుకో

మేఘసందేశం మోసుకొచ్చిన మేఘమే
ఇన్ని ముత్యాలు కుమ్మరిస్తున్నందుకేమో
మౌనానికీ ఊహలూగడం తెలిసినట్టుంది..💜