విన్నారా ఎవరైనా
కన్నీటి స్వరం ఎలా వినడుతుందో తెలుసా
హృదయతంత్రులు తెగుతున్నప్పుడు మ్రోగుతుందది
వేసవికాలంలో వణుకు తెప్పించే దుఃఖంలా
విషాదం కరిగి నీరై ప్రవహించినప్పటి చప్పుడది
దాగుడుమూతల్లో చేజారిన బంధములా
ఆత్మను వలసిపోతూ పాడే పిట్టకూత వంటిది
హెచ్చుస్థాయిని అందుకోలేని వర్ణంలోని ముక్తాయిలా
గొంతు పూడుకుపోతున్నా చీల్చుకొని ఎలుగెత్తాలనుకొనే స్వరమది
ఎన్నో నిద్రలేని రాత్రులు గుండెల్లో పరిమళించిన గులాబీలే
ముళ్ళు గుచ్చి రక్తాన్ని చిందించి నవ్వుకొనే కూజితమది
నిజమే..ఈ జలదరింపు చాలా కొత్తగా ఉంటుంది
అలవాటైతే సందర్భానుసారం దానంతటదే పల్లవిస్తుంది..😔
No comments:
Post a Comment