//వానపల్లకి..//

వానొచ్చిన ప్రతిసారీ వావిరిపూల వాసనలు

కుంకుమ కరిగిన సాయింత్రపు మైమరపు ఇప్పుడో జ్ఞాపకం

ఓ పక్క తడిచిన పూలబరువు ఆవహించినట్టయ్యి

విరహాన్ని మించిన వేదనేదో ఎదను ఒత్తినట్టు తొలిముద్దు హాయిని తోసుకొస్తుంది

ఆకాశ మేఘాలు కలిగించిన కలవరానికి

ప్రకృతి పూర్తిగా లయమై ఒళ్ళప్పగించి సయ్యాడుతున్నట్టు

ఆ మెరుపుల వేగానికి వసంత పల్లకి ఊగుతుంది..

మట్టివాసన పసిపిల్లల పాలవాసనై ఆ పాతమధురంలా గుప్పుమంటూ

చిన్నారుల కేరింతలో కేకలో మిన్నంటినట్టు

ఎటుచూసినా అదో తొలకరి సందడి

ముసురేసుకు కదులుతున్న కాలం

మూగబోయింది పరవశానికో విషాదానికో తెలీక

నేనూ ఓ నిట్టూర్పుని రాల్చుకొని నెమ్మదిస్తాను