//కన్నుల కవిత్వపు రంగు..//

ఏ ఒక్కసారీ ఉండనా నీకోసం
అని అడగవే..
కాసేపు ఆగమని అడగాలనుకుంటానా
అలసిపోయిన నీ కన్నులు గుర్తొస్తాయి..

అవును నాకిష్టం
వైశాఖపు వెన్నెలంటే ఇష్టం
కలలతో కలిసి మరీ కురిసే నీ కన్నులంటే ఇంకా ఇష్టం

తేరిపార చూసేందుకు
మరో రెండుంటే బాగుండన్నట్టు
అరనవ్వుతూ నీ కళ్ళు
నా అంతరంగపు యాత్రంతా చేసేస్తాయి

మౌనంగానూ మాట్లాడగల నీ కళ్ళు
కవిత్వపు రంగుని అద్దుకొని ఉంటాయేమో
చదివేందుకు రమ్మని పిలుస్తుంటాయి
తీయనైన గుబులురేపే నీ చూపు
నిదురలేదని వాలిపోతే
హృదిలో ఆర్తి కరిగి నా ఆనందం సమాప్తమవుతుంది

వేకువకు కోటితంత్రులు మీటినట్లు
నీ ఏకాంతం రవళించినట్లయితే
నేనొచ్చి నీ నయనాలు చుంబించినట్టు గుర్తించు
రెప్పలపై పల్చటి నవ్వు మాత్రం నా ఊహకే వదిలుంచు..💞