//తొలివానలు..//

దోసిలి పట్టి నిలుచున్నంతసేపూ
ఒక్క చినుకూ కురవలేదు
ఆత్మస్పర్శను మరచి నిశ్శబ్దానికి
చేరువైన క్షణాలలో అనుకుంటా
నక్షత్రం రాలినంత తేలిగ్గా కొన్ని నవ్వులు ఒలికాయి..

పూలకారు పులకింతలన్నీ
ఒకేసారి కానుకైనట్టు
నీ పలకరింపులు.. చీకటిలో రంగుల కలలై
నన్ను పొదుపుకున్నాయి..

మూగబోయిన కోయిలకు
మల్లెల మత్తు ఊరింపుతో పాడాలన్న కోరిక తీపై
వివశత్వంలో పడి లోపలి స్వరం
సంకీర్తనై సాగి పురివిప్పుకున్న స్వప్నాల సంతోషపు అలజడైనట్టు

పువ్వులా తడిచి బరువెక్కినా
ఇష్టమైన అనుభూతులు తేలికేగా అప్పుడు..
మనసు పట్టని మన గుసగుసలన్నీ
నీలిమేఘాల తొలివానలేగా నాకిప్పుడు..💜