ఈ వెన్నెల
నాలో జీవనసారాన్ని నింపుతున్న వేళ
ఏకాంతం తలుపు తెరిచి
పున్నాగవరాళిలోని అదే పాటని
గుసగుసగా మొదలెట్టింది
గుండెలో సంగీతానికప్పుడో చలనమొచ్చి
తనువంతా పరిమళాన్ని మేల్కొలిపింది
బందీ చేయాలనుకున్న క్షణాలు
ఆనందంతో ప్రవహిస్తూ మలుపులు తిరుగుతున్నప్పుడు
రెప్పలమాటు మోదుగుపూలు ఎర్రగా నవ్వి
పూల ఋతువుని గుర్తు చేస్తున్నాయి
చిరునవ్వు పులకింతగా మొదలైనప్పుడు
చల్లగా ఒణుకుతున్న మనసు
వెచ్చదనాన్ని ఊహిస్తూ తాపాన్ని రచించమంది
మెల్ల మెల్లగా మోగుతున్న మోహం
అల్లిబిల్లి రంగుల ఊహగా విరబూసి
ఆషాడమేఘపు నీలి తుంపర్ల మధువు
నా దోసిలిలో నింపుతోందిలా..
No comments:
Post a Comment