// రహస్యకవనం //

తలుపు తెరవని మనసు గదిలోకి
కెరటాలుగా వెన్నెల కురిసిందంటే
చీకటినెవరో నిశ్శబ్దంగా తీసేసిన నిశ్చింత
చలిమంట వెచ్చదనమైనంత పులకింత

పున్నాగపువ్వులు సన్నాయిరాగానికి
ఊపిరి తడబడి సరాగపు శృతినందుకున్న
దరహాసపువీచికల నాదం
బుగ్గలపై రాసుకున్న ఓ రహస్యకవనం

గుండెచప్పుడు ఆహ్వానించిన గానానికి
నిశ్శబ్దాన్ని నెమరేస్తున్న క్షణాల ఉలికిపాటు
పెదవులు పాడని పాటలుకాగా
క్రీగంట సరఫరా అయిన తీపికారంలాంటిదీ మౌనం

ప్చ్..అదంతే..
కోటిలిప్తలు దూరమైన కోమలస్వప్నం
అదృశ్యమైన అద్భుతం మిగిల్చిన కలవరం 💕