//మాఘమాస వెల్లువ//

పొగమంచుతో నిండిన వేకువ
మాఘమాసపు మధుమాధుర్యానికి మగతను చేర్చి
పూల పరిమళముగా మనసంటిన వేళ
అనంతమైన పరవశం కన్నులను తాకి సన్నటి వణుకు
తెల్లవారి కలను చిలకాలని చూస్తుంది..

బిడియపడ్డ క్షణాల అవ్యక్త భావనేదో
రంగు మారి కొత్తగా చిగురించేందుకు
నులివెచ్చని చోటుకోసం మనసువాలుల్లో వెతుకుతూ
కాలాన్ని కాసేపాగమని ప్రాధేయపడుతుంది

పెదవంపుల్లో నవ్వులు ఇంద్రధనస్సులై
విచ్చుకున్న వైనం..
బుగ్గపై ఓ తడిముద్దు చప్పుడైన శబ్దం
కొత్తపాటగా నన్ను ఆలింగనం చేసే తమకం
ఆనందమనే కువకువను కప్పుకోవాలనిపించేంత ఇష్టం కదా మరి ..

నాకైతే
అరుదైన అపురూప ఆలాపనే ఇది
ఊపిరాడనివ్వని సంపెంగి దండలా నన్ను పెనవేసినది..:)