//వలపు మాయ//

హృదయానికి దగ్గరగా వినిపిస్తున్న కూనిరాగాలు
నీ పెదవులు కలవరిస్తున్న నా పేరైతే..
రంగురంగుల ఊహల్లో మెరుస్తున్న వలపు మనదేగా..

నీ ఊపిరి తగిలిన ప్రతిక్షణమూ ఓ పులకింత కాగా..
కలలన్నీ అలలుగా ఎగిసి అందమైన కవిత్వమై...
అనంతానికి చేతులు చాచి ఆకాశాన్ని హత్తుకున్నట్టు..
నాకోసం విశాలమైన నీ బాహువులు నన్ను దాచుకొనే మృదువైన సంకెళ్ళు కదా..

చల్లని వానతుంపర్ల సొగసైన సోయగం నా గుప్పిట్లో ఒదిగి ముత్యాలు కరిగినట్టు
నిశ్శబ్దంలో నువ్వాడే గుసగుసలన్నీ గుండె ఝల్లుమనిపించి
కవ్వింతలు పుంతలు తొక్కుతున్న జలపాతాలేగా....

అప్పుడెప్పుడో నన్ను ప్రాణమంటూ విరహిస్తే నవ్వుకున్నా..
ఇప్పటికీ నీకు చేరువ కాలేని ఈ కొసన నేనున్నా..
కనికరించడం తెలిసిన కాలాన్నందుకే వేడుకుంటున్నా..
వచ్చే వసంతానికైనా నీ జతలో నన్నుంచమని... 😒