//నిశ్శబ్దం నవ్విన సమయం..//

"ఎదలో వెన్నెల..వెలిగే కన్నులా.."
అపరిమితమైన జ్ఞాపకాలు వెల్లువైన వేళ
అంత'రంగస్థల'మంతా నీదేగా ఏకఛత్రాధిపత్యం

గోధూళి పరిమళిస్తున్న తీయదనమేదో
ఏకాంతం కమ్ముకున్నంత మేరా
వలపు రాగరంజితమవుతుంటే
ఈ నిశ్శబ్దానికి సరిపడా మౌనాన్ని నేనాలకిస్తున్నా

హద్దులేని కలలెన్ని దాచుకున్నందుకో కనులు
వెచ్చని ధారలనాపుకుంటూ
మధురక్షణాల మాలను మనోభావాలుగా మార్చాయి

నన్ను చూసి నువ్వు నవ్విన ఆనవాలేదీ లేకపోయినా
ఆ చందమామ కురిపిస్తున్న ఇంద్రజాలం
నీ అనురాగపు కలనేతగా నన్నల్లుకుంది
ఇప్పుడు నిశ్శబ్దంలో నాకు నచ్చిన రాగం..
ఊహల మోహనంలో మనది 'ఏకతాళం'..:)