//ఏమవుతానో తెలీదు..//

ఆ కన్నుల నవ్వుల్లోకి పూర్తిగా చూడకుండానే

తొలిచూపుల కలవరం రేగి గుండెల్లో చిత్రమైన నిశ్శబ్దం

ఎద కోలాహలమో ప్రశాంత పవనమై

తీయని నిస్త్రాణలోకి నెట్టినదీ హాయి సౌరభం

క్షణాలు అలలై కదులుతూ నీ తలపుల తీరాన్ని సంగమిస్తున్న వేళ

నా ఏకాంతమో అంతుపట్టని మహార్ణవం

ఎందుకలా నీ కళ్ళు..

కౌగిలి చాచి రమ్మన్నట్టు ఆ రెప్పలు

తదేకమై నన్ను తడుముతాయి

మనసుని జోకొట్టినట్టుంటూనే

మధువనంత పులకింతల పుప్పొళ్ళు జల్లే

చిలిపి కలువమొగ్గలై ముద్దుగుంటాయి

ఏమవుతానో తెలీదు..

తొంగిచూసిన ప్రతిసారీ..

ఏడురంగుల ఊయలేసి ఊపుతున్న పొత్తిళ్ళు నాకు గుర్తొస్తుంటే

పసిపాపనై మరో జన్మెత్తేందుకు కలవరిస్తాను..💕💜