//నన్ను గుర్తించు //

 

ఏమీ చెప్పకుండా వెళ్ళావేమో నువ్వప్పుడు
ఏదో మిగిలుందని నాకనిపిస్తుంది నిన్ను చూసినప్పుడు
ఈ నిశ్శబ్దపురొద భరించలేనని నీకు తెలిసుండాలి
ప్రతిరాత్రీ నిదురను వెలేస్తుంటానని తెలిసినప్పుడు

ఇన్నాళ్ళూ నువ్వెక్కడున్నావోనని వెదికిన చూపులు
ఇప్పుడు నవ్వులుగా మారిన సంగతి గుర్తించావా లేదా
ప్రవాహం ఎక్కువవుతోంది తెలుసా..
కొంచం దిగులు..కొంచం ఆనందం..కొంచం అసహనం..ఇంకొంచం అంతర్మధనం

ఆఘమేఘాలుగా ఏవో జ్ఞాపకాలు
కురిసి నన్ను తడిపేసేందుకు సిద్ధంగా ఉన్నట్టు
జన్మజన్మల సాన్నిహిత్యం ఏదో గుర్తొచ్చినట్టు
కలలోనో కలవరంలోనో ఉలికిపాట్లు

నీకూ నాకూ మధ్య అడ్డున్న ప్రహరీని పడగొట్టు
అశ్రువులన్నీ వానచుక్కలయ్యేలోపు నన్ను గుర్తించు 💞💜