//దారితప్పిన నేను//

ఏడుస్వరాలు ఏకమైనట్టనిపించే నేను
ఏడు జన్మలుగా నిన్ను అనుసరిస్తున్నా
సంగమ స్వరఝరిలా అటునిటు ప్రవహిస్తూ
కాస్తయినా తడపవెలా..

గతంలోని గాయాలు రేపుకొని
గతితప్పిన ఇతిహాసంలోని
నిశ్శబ్దాన్ని ఓర్చుకుంటావ్ కానీ
నేనాలపిస్తున్న వలపురాగాన్ని ఆలకించవెలా..

స్వప్నంలో దారితప్పిన నేను
నీ తలపుల వాకిటనే నిలబాడ్డా
కనులెత్తి నువ్వు రాస్తున్న
చాటుకవితనని పసిగట్టవెలా

లిప్తలుగా కదులుతున్న కాలంలో
అలుపెరుగక ఎగిసిపడుతున్న కెరటంలా
ప్రకృతికి పూసిన నందివర్ధనపు పువ్వులా
నీ మౌన ప్రవాసానికి సవ్వడిలా
అంతర్లోకాన మనసైన పల్లవిలా
సజీవమై నిలిచినా చూడాలనిపించలేదా..

ఏ మేలిమలుపులో ఎదురవ్వాలో నేనిప్పుడు
నీ ఊహల పువ్వొత్తుల పొగలో నన్ను గుర్తించేందుకు 😉💜