//నావైపు చూడవూ//

చినుకులు వర్షంగా మారితే

నీ చూపులు నవ్వులుగా మారినట్టు

తడి మట్టి పరిమళమేదో నాలో మొదలైనట్టు
ఊపిరాడనివ్వని పచ్చివాసనో తమకమయ్యినట్టు

పొలిమేరలు దాటిపోతున్న చీకట్లు
మధురానుభూతులు మాత్రం మనసుకి మిగిల్చాక

ఇన్ని క్షణాల తాదాత్మ్యం
యాదృచ్ఛికం కాదని తెలిసిపోయింది

ఏకాంతం చేరువైన మురిపెములో
అంతులేని ఊహలు కొట్టుకొస్తుంటే
ఇప్పుడంతా మనదో వేడుకగా
అప్రమేయమైంది మది ఆహ్లాదం

కాస్తంత నావైపు చూడవూ..
నీ విషాదానికి ఆటవిడుపు నేనవ్వాలనుంది 💕💜