//మకరంద ధార//

ఇన్నాళ్ళుగా రవళించకుండా ఆగిన మది
నిద్దురపోతున్న స్వప్నాన్ని ఎందుకు లేపిందో
కొబ్బరి మొవ్వలో కదిలే వెన్నెల మెత్తగా తనలోకి జారి
మునుపులేని స్పందనకు శ్రీకారం చుట్టింది

మధురభావానికి మందహాసం తోడై
నా చెక్కిలిపై పరచుకున్న వింత కాంతి
నీ చూపుకొసలు మృదువుగా మీటిన కిరణాలై
అవ్యక్తపు వెలుతురు వెదజల్లినట్టి పరవశం

చిగురు కోసం ఎదురుచూస్తున్న ప్రేమఋతువులో
అనురాగపు సరాగం సంగీతమై
ఏకాంతపు ముగ్ధలావణ్యాన్ని మనసంతా పూయించి
ప్రేమాక్షరాల కృతులు ఆలపించమని ఆదేశించిన వెన్నెలరాతిరి
అలవోకమైన మకరంద ధార
అరమోడ్పుల పారవశ్యాన్ని అందించడమంటే
చినుకుగా జారిన కన్నీటి రుచి
తీయగా మారి ఆనందపు తీపిని తెలిపినట్టుంది 💜