//తపమా..//

వసంతం తలుపు తట్టి
వినిపించే యుగళగీతాలు ముత్యాలసరాలైనప్పుడు
ఆ కనుసైగలన్నీ నువ్వాడే ఊసులేగా..

రేపు రాయబోయే చరణంలో
నీ కన్నుల కాంతి వలయాలే
నా అనుభూతి క్షణాల ఆదివాక్యాలు

ఉనికినందించే పూల పరిమళంలా
నీతో చెప్పాలనుకున్న అర్ధమరాత్రి కబుర్లు
చీకటిలో మెరుస్తున్న ఆరుద్ర నక్షత్రాలు..

చిలిపిదనం తెలియనట్టుండే నీ చూపులు
నా మనోవ్రతాన్ని మరిపించి అల్లుకున్నాయంటే
ఎంత పసిదనాన్ని పలవరించాయో..
మౌనాన్నందుకే నే సహిస్తున్నా..
నీ కళ్ళలో నా కలను చూస్తూ మురిసిపోతూ
తపిస్తున్న హృదయాన్ని మెత్తగా జోకొడుతూ..💜