//మోదుగుపూల చూపులు//

మోహపు ఒరవడికి మోదుగుపూలు పూసిన కన్నులు

అరమోడ్పులై అశాంతిని రెప్పలార్చుతాయి

ప్రేమ పరవశమొకటి ఆలాపనగా మొదలై

పగలే కలలకి కబురెట్టి రమ్మంటే

హృదయం బరువెక్కినట్టు అనిపిస్తుంది..

మౌనంగా నీతో సంభాషిస్తున్నందుకు

మాటలు అలిగి ఎటో పోయినా

దూరం తరగని క్షణాలు కోపిస్తున్నా

మదిలో సంగీతం మాత్రం స్వరకల్పన ఆపలేదు..

ఎదురుచూసేందుకేం లేదేమో మరి..

నీ గుండెచప్పుడు పల్లవినే పాడుతున్న వేళ

నా గుండెగది ఇరుకయ్యిందేమోనని చిన్న అనుమానం..😉💕