//నీ ధ్యానంలో..//

చీకటైతే గడ్డకట్టే నిశ్శబ్దంలో
నువ్వూ నేనూ పంచుకున్న పాటలు వింటుంటా
కనుమూస్తే కలలొస్తాయని తెలిసినా
కల్పనలోనే కరిగిపోతూ నేనుంటా

పదే పదే గుర్తుచ్చే నీ కళ్ళు
చంద్రోదయానికి రమ్మన్నట్టు తేలిపోతా
మనలా చూపులతో నవ్వుకోవడం

ఎవ్వరికీ తెలీదనుకుంటా

నిద్దురలోనూ నన్నే కలవరిస్తూ
అలజడవుతున్న నీ మనసు తెలిసి
రేయంతా నే తపనపడుతుంటా

ఏకాంతమంత వింతకాంతి
మనోహర దృశ్యంలో నిన్ను చూపిస్తే
రెప్పలు తెరిచే నీ ధ్యానంలో పడిపోతా

నువ్వు పంచుతున్న వాత్సల్యానికి తోడుగా
వెన్నెలంత సొగసుగా
నా హృదయమెప్పుడూ
పరిమళిస్తూనే ఉండాలని నేననుకుంటా 💕