//మౌనం..దూరం..//

మౌనంగా మొదలైన మాటల్లో

గుసగుసలే కవనాలై

బుగ్గల రంగు మార్చిన సంగతి

ఈ రాత్రి నీకు చెప్పినా అర్ధంకాదు

అక్కడ తొలకరితో మొదలైన వాసన

ఇక్కడ నే చిలుకుతున్న సిగ్గు సమానమై

నీతో నేనున్న రహస్యపు అలజడి

మదిగదిలో సంగీతమైందని చెప్పినా నమ్మవు

అరచేతుల ఏకాంతంలోకి ఓసారి తొంగి చూడు

ఆకాశం కింద మనం కూర్చున్న భంగిమ

నన్ను నీకు కోల్పోయినట్టు కరిగిన నీటిచుక్క

నిశ్శబ్దం రవళిస్తున్న హాయినైనా ఆలకించు..

లోకమింత విశాలమైందని తిట్టుకుంటే తప్పులేదుగా..

ఒకరికొకరం అందనంత దూరాన్ని లెక్కకట్టినప్పుడు..😁💜