//పరధ్యానం..//

ఎదురు చూస్తున్న కాలానికి రెక్కలొచ్చి

ఎగురుకుంటూ నా ముందు మోహరిస్తున్నా

పరధ్యానం పలుకదెందుకో

సంతోషంతో విప్పారిన చూపులు

గుండె తలుపు తట్టి మరీ ప్రశంసించే

అందమేముందేమో నాలో

పూల ముచ్చట్లు ఆలకిస్తున్న కన్నులు

ఒక్కసారిగా కలవరాన్ని తూలి వాలినవెందుకో మరి

నన్ను తరుముతున్న భావం నీ ప్రేమరాగమని

ఓలలాడుతున్న హృదయానికిప్పుడు తెలిసిందేమో..!

అలల ఊసులో ఆంతర్యాన్ని వెతికి

చిగురిస్తున్న ఊహలతో కొత్తపాట రాసి

నీకర్పించాలనే ఆత్రమెందుకో..!

మునిమాపుకే ముంచుకొచ్చే మంచు తెర

ఈ పూటేం విశేషాలను పంచుతుందో

నిశ్శబ్దానికి ఎదురు చూడాల్సిందే..😊💜