నీ జ్ఞాపకం
నా ఏకాంత వెన్నెల తిన్నెల్లో
స్వరానికడ్డుపడుతూ
నన్ను తనవైపు ఆకర్షిస్తూ
మనసు మెత్తదనాన్ని మరింత మైనంగా మార్చేస్తుంది.
ఎన్ని రాత్రులు దాటినా
అదేమో ఈ పున్నమి నాటికి
దేహం ఆపలేని మనసు దిక్కులను ధిక్కరించి నిన్నంటుతుంది
నాకున్న భావాలు
నీకుండవని తెలిసినా
ముడివిప్పలేని బంధమొకటి
జాలువారుతున్న చంద్రికల సౌందర్యాన్ని తిలకించగానే
నీ తలపులోనైనా కరిగిపోమ్మని ఉసిగొలుపుతుంది.
నిశ్చలమయ్యేందుకు నీ జ్ఞాపకమో కొలను కాదుగా
ఋతువులకతీతమై నన్ను తడిపే
కుదురులేని జీవనదంటే అతిశయోక్తి కాదుగా..!!
No comments:
Post a Comment