కురుస్తోంది వాన
నాపై నీకున్న ప్రేమలా
మునుపెరుగని ఉల్లాసమేదో లోలోన
హృది నవ్విన శుభసమయాన
మెరుపు కిరణాలన్నీ చేరి ఆకాశాన్ని వెలిగిస్తుండగా
కలవరధ్వనులతో రాత్రి ప్రకాశిస్తోంది
ప్రేమపక్షులు గూళ్ళలో సయ్యటలాడే వేళ
మదిలో కుసుమగంధాలు పోటీగా
కమ్మగా వ్యాపిస్తున్న మట్టివాసనకు
సమయాసమయం లేని నెమళ్ళు పురివిప్పుకోగా
వర్షధారలు నాట్యం చేస్తూ ఆకాశానికీ భూమికీ తెల్లనిదారాలతో ముడేస్తుంటే..
గాలి సైతం పగలబడి నవ్వుతున్నట్లుంది
క్షణక్షణానికీ పెరుగుతున్న శీతలస్పర్శతో
నవపల్లవమై కాస్త ఒణకడం గుర్తుంది
ఆపై నీ హృదిలో చేరిపోయాక ప్రపంచంతో సంబంధం తెగిపోయింది
అయినా వేరే తొలకరులు నాకెందుకులే
ప్రతిక్షణమూ ప్రేమతో కురిసే నీ చూపులజల్లులుండగా..!!
No comments:
Post a Comment