నీలో నువ్వు అంతర్ముఖమై అంతఃచక్షువులతో
అస్తిత్వాన్ని చదువుకున్న వేళ
అంతరంగానికి ఆడా మగా ఒకటేనని
అద్దంలా వెలిగే వ్యక్తిత్వానివి
అనుభవిస్తున్న చింతలూ వంతలూ
వెంటాడే జ్ఞాపకాలూ..నిన్నటి ఆనందాలు
నిష్కారణ బాధలూ..గుండెల్లోని ఘర్షణలు
నిష్కృతి కోసం ఎదురుచూసేందుక్కాక
తారా తారా నడుమ ఆకాశపు అందంలో
అప్పుడప్పుడూ శూన్యాన్ని స్వీకరించగలిగే సత్యానివి
క్షణాల సాన్నిథ్యంలో..ఆత్మ వశీకరణంతో
కన్నీటి చుక్కల్లోనూ కుంచెను ముంచుకొని
ఊహలు చింత్రించుకోగల తపనతో
చీకట్లో సూర్యోదయాన్ని రెప్పలకద్దుకోగల నేర్పువి
మానసికంగా నువ్వెప్పుడూ చైతన్యానివే..
అక్షరలక్షల సముపార్జనలో విజయుడివే..!!
No comments:
Post a Comment