//నా పాట..//

ఎక్కడి నుంచి వినిపిస్తుందో పాట
"సంపెంగి నవ్వుల నువ్వేనా.."
మళ్ళీ అదే మైమరపు
ఆ పాట నాకోసమే నువ్వు పాడినట్టు
నానార్ధాలతో నన్ను మెచ్చుకున్న పాట..
ఒక స్పందన నిలువెల్లా పాకి
కలో నిజమో గిల్లుకొనేలోపు పూర్తయిపోతుంది

ఆనందంతో కొట్టుకులాడుతున్న గుండె
హృదయాలు కలిసిన చోటే ఆగిపోమంటుంటే
నిరసనలోంచీ మళ్ళీ మొదలవుతుంది
ఎక్కడో మునిగి మరెక్కడో తేలే అలల్లా
కొన్ని స్మృతుల జోరు
నరాలు జివ్వుమనిపించే మధుపవనపు హోరు..

కాలం పాటగా మారిన చోట
కన్నుల్లో విరిస్తూ నవ్వులు కొన్ని
నీకు వశమై కొన్ని జన్మల తపనలు తీరాక
మంత్రాలతో పనిలేదంటూ..:)