//ఇంకేం మాట్లాడను..//

ఒక్క పలకరింపుకే నేనెదురు చూస్తుంటా
నిన్న కొంగుకు కట్టుకున్న ఆనందాలు
ముడివిప్పిన సీతాకోకలై నేడెగిరిపోతుంటే
అందుకోలేక అలసిపోయి చతికిలబడుతుంటాను

నిన్ను తడమలేక ఓడిపోయిన నా తలపులు
నులివెచ్చని నిరాశను ఒలికించబోతే
గుండెల మీద చెయ్యేసుకొని ఊరడిస్తాను
నీ వర్ఛస్సుతో వెలగాలని చూసే నా కన్నులు
ఎదురుచూపుల భంగపాటుతో సోలిపోతుంటే
రాబోయే ఉప్పెనను రెప్పలకు తెలియకుండా దాచాలనుకుంటాను.

మానసికానందం మరచిన నీ చెలిమిలో
ప్రతిసారీ నువ్వపరిచితమవుతుంటే
జ్ఞాపకాన్ని పారేసుకోలేక
నీకు నేనేమవుతానన్న ప్రశ్నతోనే మౌనాన్ని సంధిస్తుంటాను..
ఇప్పుడింకేం మాట్లాడను..
నీతో కలిసి కదలాలనుకున్న కాలం ఏకాకిగా నన్నొదిలేసాక..
నాతో నేను బ్రతకలేక నిర్జీవితనై మిగిలిపోయున్నాక..