//ప్రేమభావము//

కొన్ని భావాలంతే..
పెదవిదాటి బయటకు రాలేక
ఎదలోనే మౌనవించి
అల్లరి అదుపు తప్పినప్పుడల్లా
నన్ను నన్నుగా ఉండమంటూ..
అనుభవతీర్ధంలోకి రమ్మంటూ
నన్నాహ్వానిస్తాయి..

నిన్నటి కనుల కొలనులో
నిలువెత్తు నీ రూపం
ఈదులాడుతుంటే
దీపావళి జ్యోతుల్లా..కార్తీక దీపాల్లా
వెలుతురై విచ్చుకున్న ఆనందంలో
కాలావధులన్నీ చెరిపేసా

ఆకాశం నుండి రాలిన వెన్నెల తునకలను చేరదీసి
అనుభూతుల రాగాలను కలగలిపి
ప్రణయన్ని వేదంలా వల్లించే సమయాలలో
ప్రతిసారీ కొత్తదనమే కనుగొంటున్నా

ప్రేమగంధం అంటినవారికి
సంపెంగలూ..సన్నజాజులూ సమమేగా
అమృతధారలేవీ కురవకపోయినా
తడచిపోవడం మాత్రం నిజమేగా

చిక్కుకున్న నీ తలపుల వలలో
నా కలలన్నీ కవితలయ్యాక
పెదవులపై అరనవ్వు చేరి
ఒంటరితనాన్ని ఏకాంతంగా మార్చింది..
ఒక్కసారిగా నీ తలపు నాదయినట్టు..
నీ గురించిన ఆలోచనలన్నీ ఏకమైనట్టు..!!