ఒంటరిగానే ఉండాలనిపిస్తోందెందుకో
విఫలమైన కోరికను నెమరేసుకుంటూ
గుండె చప్పుడెందుకో కఠోరంగా వినబడుతోంది
కాస్త అదుపు తప్పినందుకేమో
నిర్వేదమో..నిర్జీవమో
అదో శూన్యాకాశమైన భావమేమో
ఏదో తడుముకుంటోంది
ఎందుకిన్ని కలలు కంటావనో
ఎందుకిన్ని ఊహలు అల్లుతావనో
ప్రతి ఆలోచనా వేయిగా విడువడి
మస్తిష్కాన్నే చిందరవందర చేసేస్తూ
నిశ్శబ్దమే ఘోషగా మారి
తలపులో సుళ్ళు తిరుగుతూ
విషాదంలోకి జారిపోతుంది
అర్ధం కాని ఆశల నిట్టూర్పులో
శ్వాస సైతం చీలిపోతుంది
అదేనేమో..అంతరంగం ఇరుకైన భావనంటే..!!
No comments:
Post a Comment