కదలనంది కాలం..
కలవరించే హృదయాన్ని నిలువరించలేకున్నా
ఊహకందని మోహం వివశమై
నన్నల్లుకునేవేళ
నీవెప్పుడూ నాతోనేనన్న నిజం
ఎక్కడున్నా నీ ఊసు నేనేనన్న నమ్మకం
నా ఊపిరిని స్వరబద్ధం చేస్తుంది
నీ భావాన్ని అవలోకించి చూడు
మందహాసంలో మధురిమగా మారి
నీ అధరం నేనవలేదూ..
ఆ కనుపాపల నల్లని వెలుగులో
నీ రాత్రిని వెలిగించే దీపం నేనవలేదూ
నీ హృదిలోని మార్దవం
నేనని తెలిసాక
నీ మనోరూపాన్ని నేనన్నది సుస్పష్టమేగా..!!
No comments:
Post a Comment