ఎలా వచ్చావో తెలీదు
ఎప్పుడొచ్చావో కూడా గుర్తులేదు
కానీ నీ అడుగుల చప్పుళ్ళు
నా గుండెకు చేరినట్లు
ఎవరో మెత్తగా నడిచెళ్ళిన భావనప్పుడు
మళ్ళీ వచ్చావు
పదివేల పువ్వుల పరిమళాలేవో మోసుకుంటూ
ఎదకనుమలలో నడిచి నడిచి
అకస్మాత్తుగా పెదవులపై చిరునవ్వుగా జారావు
ఉషోదయాలు మాత్రమే తెలిసిన నాకు
రసోదయాలు..
మనసే మోహనమయ్యిందో
నీ రాకే శ్రీకరమయ్యిందో
మూగగొంతులో ఎన్నడూ పలుకని రాగాలు
పదేపదే ప్రపంచానికి దూరంగా నన్ను లాక్కుపోతూ
నీ సాన్నిధ్యంలోని అలౌకికం
నాలోని నన్ను కొత్తగా చూపిస్తూ
తడిచినుకు పాటలేవో రాయమంటూ
మళ్ళీ వెళ్ళొస్తావెందుకో
నువ్వొచ్చిన సంతోషాన్ని కాస్తైనా నిక్షిప్తం చేసుకోకుండానే
ఊపిరై నాలో చేరిన ప్రతిసారీ
నిశ్వాసగా నిన్ను వదలాలంటే బాధగా ఉంటోంది
కానీ నా ఉచ్ఛ్వాస నిశ్వాసల్లో నీవు నిండావనే
ప్రాణమింత హాయిగా ఉందనిపిస్తోంది..!!
No comments:
Post a Comment