//నీవే విపంచి//

ఆరుకాలాలూ ఆమనిగానే అనిపించే ఓ మధురభావం..
నీ తలపుల్లో లీనమైనందుకే కాబోలు..
ఏడేడు జన్మాల బంధమని లోకులంటారు కదూ
నాకైతే వేయిజన్మలైనా నీ సాన్నిహిత్యం చాలదనిపిస్తోంది
అయినా ఎందుకలా దిగంతాల గురించిన ఆలోచనలు..
అంతర్నిహితమై నీలోనే నే కలదిరుగుతుండగా
పాటలే మిగలని శిశిరంలా మౌనవిస్తావెందుకు..
గలగలరావాలతో అలరించే నేను తోడుండగా
చైత్రమై నేను చేయి చాచింది..
వసంతకుసుమమమై నిన్నల్లుకొనుండాలనేగా
ఎక్కడ సమాప్తమవుతుందో తెలియని విషాదంపైన అడుగేయక
అనురాగపు నక్షత్రమై నిలబడ్డ నా చెంత చేరవూ
నా ప్రేమను విపంచివై ఒక్కమారు ఆలపించవూ..!!