కాలానికి గాలమేసినా
అందుకోలేని దూరం నడకని నిర్వీర్యం చేస్తుంది
మబ్బుపట్టిన ఆలోచనల తాకిడికి
మనసులో ఎగురుతున్న ఆశల గాలిపటాలు
ఒకేసారి నేలకూలిన కర్ణోపేయమైన శబ్దాలు..
రెక్కలు తొడగని చిన్నారి ఊహలన్నీ
చిద్రుపలై రాలిపడుతుంటే తెలుస్తోంది..
అనుభూతి రాహిత్యమైన మనసులో
నివసించడమెంత దౌర్భాగ్యమో..
నిలకడలేని నిశ్శబ్దం తాండవమాడి
సూక్ష్మమైన బుద్ధికి ప్రళయగర్జనేదో వినబడినట్లు
కూలిన ఆశల చప్పుళ్ళలో
మరణమృదంగమొకటి వాయించినట్లుంది
స్వానుభూతుల నిర్జన గృహంలోకి మనసుని పదపదమంటూ..
రెప్పల చాటు ఉప్పెనను చెలియలకట్ట దాటనివ్వొద్దంటూ..!!
No comments:
Post a Comment