ప్రత్యూష పిలుపు

తొలిపొద్దు రాగంతో మనసు నిద్దురలేపిన
వలపు గాలి కదా నీదైన తలపు
పండగంటి ప్రమోదాన్ని అలుపులేక మోసుకొచ్చిన
పువ్వంత సున్నితం కదా ప్రత్యూష పిలుపు

చిరుమువ్వల సవ్వడిగా మొదలైన సంగీతం
చంచలమైన ఊహలకు సాయంగా కుదిరాక
నీలోకి అడుగులేస్తున్న ఏకాంత క్షణాలేగా
నాకత్యంత ప్రియమైన ప్రయాణాలు..
ఇష్టపదులెన్ని రాసుకోవాలో తెలియని ఆనందం
ఊసులరాసులన్నీ మూటగట్టి మురిసిన వైనాన
కాలమెప్పుడు కలుపుతుందో తెలియని సందేహంలో
ఆశలకు ఊతమిస్తూ రాయలేనా మధురకావ్యం..💞