//సామి రారా..//

మనసులు కలిసిన చతురస్రంలో
అటు నువ్వూ ఇటు నేనూ
ఒకే ఆకాశపందిరి క్రింద
నక్షత్రాలను తలంబ్రాలుగా తలపోసుకుందాం
ఊహలకు కొన్ని రంగులు దిద్ది
నిశ్శబ్ద భావాలకు భాషనిచ్చి
గుసగుసలుగా కలబోసుకుందాం

మంచు ముత్యాలు కలిసిన పూల పరిమళాల్లోని
తడిచినుకు చిలిపి తునకలు
పులకరింతలుగా మార్చి తొలకరించుకుందాం
వెన్నెల్లో చెలరేగిన మోహకలాపం
ఆలిగనంలో అంతం చేసి
గగనపు కొసన విహరించి వద్దాం
నీ రెప్పలచాటు చదివిన తపనలన్నీ
ప్రేమపాటగా బాణీ కట్టుంచుతా
రేయీపగలు తేడాలేని పారవశ్యంలో యుగళముగా పాడుకుందాం

ఇంకా ఎన్నాళ్ళని స్వప్న సుషుప్తిలో నిద్రపోతాం
కాలాన్నొక్కసారైనా ఆదమరపులో ఓడించి
అల్లరికన్నుల ఆనందభాష్పాల రుచిని
తనివితీరా తాగి మరీ తెలుసుకుందాం..:)