నవ్వుకుంటున్నా నేనే..
చినుకుగా కురిసే నీ చూపులజల్లునూహించుతూ
ఊపిరి శృతిగా శ్వాసల సంగీతానికి లయమై
నాలో అణువుగా కుదించుకు ఇగురులెత్తిన చైతన్యమైనప్పటి
నీ ఎర్రని నవ్వుల్లో మరోసారి కలువగా పూస్తూ
నెమరేస్తున్న స్మృతుల మడుగులో మునిగిపోతూ..
ఒదిగిపోతున్నా నేనే..
హృదయాన్ని కలిపితే మధురిమగా మారి
నీ తీయని కలల కలహంసగా చేరి
సురభిళ సౌందర్యాన్ని తనువెల్లా దాచి
చిరునవ్వులు చిందుంచు చిన్మయిగా..
శూన్యాన్ని నింపుకొనే కలశముగానే ..
కదిలిపోతున్నా నేనే..
సౌరభాల కల్లోలానికి ఊపిరిని తోడుకుంటూ
తేనెవరదల ప్రవాహానికి పులకింతను ఆపుకుంటూ
కన్నుల్లో ప్రవహించు అనుభూతిని దాచుకుంటూ
పరవశించు క్షణాలను పదివేలుగా పంచుకుంటూ
నీ స్వప్నానికి రంగులద్దాలని తొందరలోనే..
కురిసిపోతున్నా నేనే..
వెన్నెలకై ఎదురుచూసే చకోరముగా నిన్ను తలచుకుంటూ
శరత్తులోని మహత్తును నిలువెల్ల ఆస్వాదించు ప్రేమమూర్తివని
మకరందపు పుప్పొడిని మనసారా తాగి
గులాబీలవానకై వేచి చూసే విరహానివనుకుంటూ
నిరంతర ప్రేమాగ్నిలో జ్వలించే తాపసివనుకుంటూ..!!
No comments:
Post a Comment