ఉత్సాహం ఉవ్వెత్తాలని చేసిన ప్రయత్నాలన్నీ
వెనుదిరిగే కెరటాల మాదిరి నీరసించి
నువ్వు చెంత లేవని నిట్టూర్చడమిప్పటికెన్నిసార
నింగిని విడిచి నేల రాలిన తారకలా
పూలగుంపుల నడుమ తిరుగాడినా
నిన్ను తప్ప వేరే శ్వాసించని అశాంతిగా కదులుతున్నా
వసంతం కోల్పోయిన మదిలో
పరధ్యానంగా మొగ్గేసిన ఊహలకు
ప్రాణమొచ్చి పరిమళించడం సందేహమే అయినట్లు
వెండికాంతుల జలాలపై పడవలో విహరిస్తున్నా
నా కన్నీటి బరువు తూకానికి
హృదయమంతా ఉద్విగ్నమై ఒణుకుతున్నా
వేళ కాని వేళలో భావాలకి రెక్కలొచ్చినట్లు
అనంతంలోంచీ ప్రళయంలోకి పయనించాలని చూసే
వర్తమానాన్ని కాదని రేపటిని కలగంటున్నా
నీ కన్నుల కొలనులో కదలాడే దీప్తి నేనవ్వాలని
నీ పరవశానందపు స్ఫూర్తి నేనై
నీ నిశ్శబ్దపు సంగీతంలో జీవం నేనవ్వాలని..!!
No comments:
Post a Comment